Pecyn Shambŵm sy’n rhoi mewnwelediad i chi i’r broses o greu a chynhyrchu Shabŵm. Mae’n cynnig gwybodaeth gefndirol ychwanegol a syniadau am weithgareddau dilynol.
Byddwn yn gwerthfawrogi’n fawr derbyn copi o unrhyw waith sy’n digwydd yn y dosbarth yn deillio o’r perfformiad.
Mae croeso i chi gysylltu â ni am rhagor o wybodaeth ynglyn â chynyrchiadau, gweithdai, sesiynau meistr a rhaglenni hyfforddi yr ydym yn eu darparu.
Sut fyddet ti’n disgrifio’r sioe mewn ychydig eiriau?
Mae’n sioe sy’n trio cyflwyno cerddoriaeth a’r berthynas rhwng cerddoriaeth, swn a tawelwch i blant mewn ffordd maen nhw’n gallu uniaethu âg o. Rydan ni’n cyflwyno syniadau mwy haniaethol a creadigol i blant ac yn trio gwneud rhywbeth maen nhw’n ei fwynhau.
Sut wyt ti wedi mynd ati i gyfansoddi cerddoriaeth ar gyfer Shabwm?
Gan mod i wedi bod yn rhan o’r broses greu o’r cychwyn, mae’n wahanol i’r arfer, lle faswn i’n sgwennu miwsig ar ol i’r sioe gael ei chwblhau. Gan bod hi’n sioe am fiwsig a swn, roedd o’n gwneud sens mod i’n cyfansoddi tra roedd y cynhyrchiad yn cael ei ddatblygu. Mae hyn wedi fy ngwneud yn lot fwy ymwybodol o rol miwsig a swn yn y sioe. Mae’n fwy na rhywbeth i’w gael yn y cefndir yn unig – mae’n gyrru’r plot yn ei flaen.
Beth sydd wedi dy ysbrydoli yn ystod y broses greu?
‘Dw i’n ymwybodol iawn bod modd defnyddio miwsig a swn fel rhywbeth sy’n fwy na rhywbeth ti’n glywed yn unig. Rydan ni’n defnyddio cerddoriaeth fel cymeriad ychwanegol, ti’n dod i sylwi effaith be fedri di neud hefo miwsig a swn. Dw i’n ddipyn mwy gofalus o be ‘dw i’n neud a ma na fwy o feddwl yn mynd i mewn i pam bod swn mewn rhyw le yn benodol. Achos bod y gerddoriaeth yn rhan o’r plot bron, mae’n bwysig bod y gerddoriaeth yn gallu cyfleu pethau byddai sgript fel arfer yn ei gyfleu.
Pa gyfansoddwyr sy’n creu argraff arnat ti a pam?
‘Da ni wedi bod yn trafod ffilmiau fel The Last Frontier a Bjork, Dancer in the Dark. Ma’ hwnna am berson sy’n colli ei golwg a sut mae swn yn rhan o’i bywyd hi er bod hi methu gweld. Mae hi’n clywed synau mae pawb arall yn glywed – ond mwy fel miwsig. Odd hwna’n eitha pwysig i mi o’r dechra – bod posib gwrando ar gerddoriaeth fel swn a mae na bosibilrwydd gwrando ar swn fel miwsig hefyd.
Beth wyt ti’n ei fwynhau fwyaf am y broses ddyfeisio?
Mae wedi bod yn hwyl! Mae pawb efo’i gilydd – wedi ymlacio. Does neb ofn cyflwyno syniadau newydd. Mae ‘na lot o gydweithio wedi bod ar y cynhyrchiad. Mae wedi bod yn ‘change’ gweithio efo pobol ar rhywbeth sy’n fwy na jest miwsig.
Sut brofiad ydy gweithio’n greadigol gyda’r ysgolion ym Mon?
Grêt! Mae o wedi bod yn agoriad llygad rili. Pan mae’r plant yn yr ystâd feddwl iawn, maen nhw’n dweud petha’ fwy creadigol a boncyrs na fedrwn ni feddwl amdano.
Petaet yn cael un dymuniad yn y byd – beth fyddai’r dymuniad hwnnw?
Mae’n siwr y buaswn i’n trio gwneud rhywbeth rili nobl fel datrys rhyfeloedd neu lwgu. Ond, mae’n siwr faswn i’n landio fyny yn trio gallu hedfan neu rhywbeth!
Faint mae dychymyg plant wedi ychwanegu at y gerddoriaeth?
Dipyn go lew. Roeddan ni’n gofyn iddyn nhw be fasan nhw’n licio’i weld a’i glywed yn y sioe. Does gen i ddim plant – ella mod i’ n dueddol o feddwl am beth mae plant eisiau ei glywed ‘chydig bach yn simplistig. Pan maen nhw’n dweud wrthot ti go iawn, mae’n braf gweld y pethe maen nhw’n ystyried – pethe’ ti ddim yn ddisgwyl yn aml.
Ydy’r gerddoriaeth wedi newid lot yn ystod y cyfnod dyfeisio?
Do, ‘dw i’n meddwl. Wrth drafod mwy hefo’r plant, dw i wedi rhoi mwy o ymddiriedaeth ynddyn nhw. Gobeithio bod o reit wahanol i fiwsig plant fel arfer. Gobeithio fydden nhw’n licio fo! Fydd hi’n braf gweld a chlywed y cynhyrchiad yn ei gyfanrwydd.
Dyma glipiau o Twrw a Smic yn cychwyn eu taith o gydweithio.
Tybed pam mai rwan mae Twrw a Smic yn cychwyn cydweithio?
Dyma’r tro cyntaf i’r ddau fyd gysylltu!
Fedri di ddweud rhywbeth wrthym ni am dy gymeriad di yn Shabwm?
‘Dw i’n chwarae merch fach tua 10 oed ar hyn o bryd sydd yn byw efo’i mam a’i thad. Mae’n licio chwarae ar ei phen ei hun. Dydi hi ddim yn cael llawer o sylw gan ei mam a’i thad, mae’n sefyllfa eitha’ trist a dweud y gwir.
Sut fyddet ti’n disgrifio’r sioe mewn ychydig eiriau?
Mae’n sioe eithaf abstract. Mae’r stori yn eithaf syml, ond yn creu neges bwysig. Da ni’n defnyddio stori go iawn, teulu i edrych ar bwer cerddoriaeth.
Sut aethoch chi ati i greu y sioe?
Mae’n anhygoel. Rydan ni wedi cael rhyddid mawr. Rydan ni wedi bod yn eithaf rhydd ers y tair wythnos diwethaf yma – rydan ni wedi cael dyfeisio petha eitha ‘wacky’ , eitha newydd a reit arbrofol. Rydan ni wedi bod yn trio edrych ar y ddau fyd ‘ma – bydoedd Twrw a Smic. Roedden ni angen llinyn i gysylltu’r ddau gymeriad – dyna sut daeth fy nghymeriad i i mewn. Mae wedi bod yn broses anhygoel o ddifyr. ‘Da ni newydd gael y set i mewn heddiw hefyd sy’n gyffrous.
Beth wyt ti’n ei fwynhau fwyaf am y broses ddyfeisio?
Cael bod yn rhydd i feddwl tu allan i’r bocs, dw i’n meddwl. Mae wedi bod yn broses ddiddorol iawn sut mae pobol yn meddwl am bethau’n wahanol ond, rhywsut, rydan ni wedi gallu cysylltu popeth gyda’i gilydd. ‘Dw i wedi mwynhau gweithio mewn cynhyrchiad fel hyn sy’n hollol wahanol i gynhyrchiad sydd â sgript llawn wedi’i ysgrifennu’n barod. Dw i’n mwynhau lot mwy cael creu fy hun, mynd dan groen pethe’ yn lle bod pethe’n arwynebol. Mae’n ddyfn iawn.
Sut brofiad ydy cyd-weithio gydag ysgolion lleol ar ddatblygu’r cynhyrchiad?
Mae wedi bod yn ddifyr iawn gweithio gyda’r ysgolion. Rydan ni wedi bod yn gweithio gyda tair ysgol i gyd – ‘da ni ‘di cael dau sesiwn hefo nhw’i gyd. Mae ymateb y plant wedi bod yn anhygoel – y ffordd maen nhw wedi ymateb i gerddoriaeth, y ffordd maen nhw wedi ymateb i ni fel unigolion hefyd. Mae’n brofiad pwerus. Dw i’n gwneud un gweithdy hefo nhw lle maen nhw’i gyd yn gorwedd ar lawr yn gwrando ar ddarn o gerddoriaeth. Dw i’m yn meddwl bod plant yn cael gwneud hyn dyddia yma llawer. Ymlacio am chydig bach. Mae hynny wedi bod yn rili diddorol – eu gweld nhw’n gorwedd i lawr am tua chwarter awr, chydig fel yoga! Maen nhw’n meddalu chydig bach wedyn i feddwl yn fwy agored. Mae wedi bod yn ddiddorol iawn trio gwthio’r ffiniau celfyddydol… Fydd o’n rili braf cael mynd a perfformiad cyfan efo syniadau’r plant i’r ysgolion.
Sut brofiad ydy rhannu llwyfan gyda Llyr a Leisa?
Dw i heb rili wneud hyn o’r blaen – perfformio yn broffesiynol. Mae’n brofiad anhygoel cael Llyr a Leisa fel mam a tad i fi. Maen nhw wedi bod yna andros o gefnogol – achos ddois i i mewn hanner ffordd drwodd. ‘Dw i’n siwr gawn ni lot o hwyl!
Faint mae dychymyg plant wedi ychwanegu at y gwaith?
Rydan ni wedi penderfynu bod cerddoriaeth llawer mwy pwerus fel cerddoriaeth a ddim geiriau. Dyna gig y peth, bod cerddoriaeth yn gallu mynd a ti i lefydd gwahanol a mae dy ddychymyg di’n gallu mynd efo neu’n erbyn y gerddoriaeth. Dw i’n meddwl yn gyffredinol bod plant yn gweld hynny yn fwy na ni. Dw i’n meddwl bod dychymyg plant yn gallu mynd i lefydd mor ddiddorol. Wnaethon ni lawer o sesiynau lle roedden ni’n darllen storiau a’r plant yn dod i fyny efo straeon eu hunain – jest rhoi’r rhyddid yna i’r plant fod yn hollol greadigol, hyd yn oed os ydi’n stori wyrion sydd ddim yn gwneud synwyr. Mae’r sioe wedi ei selio ar y ffaith bod ti’n medru bod yn agored i syniadau newydd. Syniadau’r plant sydd wedi llunio’r daith.
Pwy yw dy hoff actor a pam?
Benedict Cumberbatch. Mae’n actor mor ddwys a chlyfar. Hollol dros ben llestri – ond rwy’n goelio fo hefyd – mae hynny’n braf i wylio.
Petaet yn cael un dymuniad yn y byd – beth fyddai’r dymuniad hwnnw?
Bod pawb yn y byd yn cael hapusrwydd!
Ydy’r stori wedi newid lot yn ystod y broses ddyfeisio?
Dyw’r stori heb newid lot ond mae wedi datblygu. Fel bob cyfnod ymarfer, ymchwil, ti’n darganfod pethau newydd. Ti’n cael dy ysbrydoli gan bethau newydd. Wrth fynd i’r ysgolion am yr eil dro, wnaeth pethau newid eto. Mae ein dealltwriaeth ni fel cynhyrchwyr ac actorion wedi newid hefyd. O ran y stori, da’ ni wedi defnyddio stori go iawn, stori teulu i gyfleu pwer cerddoriaeth.
Sut brofiad yw Is-gyfarwyddo’r prosiect?
Mae wedi bod yn broses ddiddorol iawn. Nes i ddechrau drwy fod yn Is-gyfarwyddwr a hanner ffordd drwodd, dw i wedi newid i fod yn actor. Mae hynny wedi newid y ffordd dw i’n gweld pethau. Rwan – dw i yn y sioe yn hytrach na mod i’n edrych yn wrthrychol ar y gwaith. Mewn ffordd, dw i wedi cael y ddau brofiad mewn un prosiect sy’n anhygoel. Mae wedi bod yn broses anhygoel gweithio mor agos gyda Iola a dysgu’r ffordd mae hi’n cyfarwyddo pethau – yn arbennig gan mod i’n cychwyn allan ar fy ngyrfa fy hun.
Fedri di ddweud rhywbeth wrthym ni am dy gymeriad di yn Shabwm?
Mae hi’n gymeriad sydd wrth ei bodd efo straeon. Dyna ydy rhan fwyaf ei bywyd hi. Mae ei bywyd yn llawn o atgofion a mae hi wrthi hefyd yn trio plethu stori ei bywyd i greu y llyfr perffaith. Mae hi’n trio casglu’r holl atgofion at ei gilydd i greu rhywbeth newydd.
Sut fyddet ti’n disgrifio’r sioe mewn ychydig eiriau?
Gwead o wahanol ddulliau yn trio priodi tawelwch, twrw, swn a cherddoriaeth.
Sut aethoch chi ati i greu y sioe?
Wnaethon ni ddechra hefo dau gymeriad eithaf pendant, Twrw a Smic ac mae hwnnw wedi datblygu drwy weithio hefo ysgolion lleol. Roedden ni’n holi’r plant, be mae Twrw a swn yn gyfleu iddyn nhw – be mae distawrwydd yn gyfleu iddyn nhw a drwy’r adwaith gafon ni ganddyn nhw, ddaru ni ddechrau creu cymeriadau. Ers hynny, mae’r cynhyrchiad wedi newid dipyn – mae gynon ni drydydd cymeriad hefyd rwan. Dyna sut aethon ni ati i ddechrau, efo dau gymeriad pendant. ‘Da ni hefyd wedi bod yn byrfyfyrio – ‘da ni di cael llwyth o ryddid – ‘da ni wedi bod yn agored iawn yn chwarae efo bob math o wahanol bethe. Mae Gruff yn gweithio hefo ni hefyd ac yn gweithio ar wahanol fathau o synau a cherddoriaeth.
Beth wyt ti’n ei fwynhau fwyaf am y broses ddyfeisio?
‘Dw i wrth fy modd yn cael y rhyddid rydan ni’n ei gael yn Frân Wen i rili drio unrhyw beth – y rhyddid i chwarae, i drio ac i fethu ac i drio eto, mae hwnnw’n beth eitha prin dw i’n meddwl. ‘Da ni rwan yn y pumed wythnos a ‘da ni dal rili heb setio ddim byd mewn carreg eto. Ond, rwan, ti’n dechre teimlo ei bod hi’n amser i ddechrau rhoi pethe’ at ei gilydd a chael mwy o strwythur. Ond, rydan ni eisiau cadw yr un teimlad o chwarae a’r rhyddid sydd ‘na pan ‘da ni’n cael byrfyfyrio. Chwynnu ‘da ni eisiau wneud rwan.
Sut brofiad ydy cydweithio gydag ysgolion lleol ar ddatblygu’r cynhyrchiad?
Gret! Mae’n lyfli achos fedrwn ni gael y syniadau fwyaf gwych, dwys neu doniol yn yr ystafell ymarfer ond nes ti’n mynd a fo allan i ysgolion ti ddim yn gwybod sut adwaith ti’n mynd i gael. Hefyd, efo defnyddio iaith, rydan ni wedi sylweddoli ella bod ein iaith ni chydig bach yn rhy anodd i’r ysgolion ddeall. Be sy’n ddifyr ydy ‘da ni ddim wedi gorfod symleiddio o gwbwl o ran cynnwys achos a deud y gwir maen nhw wedi ein synnu ni ar yr ochr orau. Maen nhw’n gael o, er bod ein perfformiad ni’n chydig bach fwy abstract na naturiolaidd, maen nhw wedi’i ddeall o. Mae hynny wedi bod yn ffantastig! Mae’r plant llawn dychymyg ac yn fodlon mynd efo ti ar daith – mae hynny wedi rhoi ffydd mawr i ni yn y broses greadigol.
Sut brofiad ydy rhannu llwyfan gyda Llyr a Gwennan?
Gret! Dw i rioed wedi gweithio hefo’r un o’r ddau o’r blaen felly mae’n brofiad newydd. Hefyd, o fynd yn y dechrau o weithio hefo jest dau ohonom ni, Twrw a Smic – i rwan gael y trydydd elfen i mewn – mae o wedi newid y ddeinameg ar y llwyfan. Mae’n gret cael rhywun arall i fownsio oddi arno, a rhywun iau hefyd, mae hynny’n dod a rhywbeth newydd i’r cynhyrchiad. ‘Dw i’n licio gweithio mewn odrif am rhyw reswm. Ma dau rhy daclus ‘dw i’n teimlo weithia. Mae gynon ni’r elfen gerddorol hefyd sy’n gymeriad arall yno’i hun mewn ffordd, felly allet ti ddweud bod na bedwar cymeriad. Y gerddoriaeth sy’n gweu’r cymeriadau hefo’i gilydd dw i’n meddwl.
Faint mae dychymyg plant wedi ychwanegu at y sgript?
Llwyth, yn hynny o beth. Mae wedi rhoi’r hyder i ni fel cwmni i benderfynu does dim angen dyfrio be da ni’n neud. Mae’r plant yn medru neidio yn eu dychymyg. Mae wedi rhoi mwy o ryddid i ni chwarae os rhywbeth ac wedi profi bod ‘na bosibiliadau di-ben draw i be ‘da ni’n wneud achos mae o’n bwnc eang ofnadwy.
Ydy’r stori wedi newid lot yn ystod y broses ddyfeisio?
Ydy, mae o! Mae gynon ni drydydd cymeriad wedi ymuno yn annisgwyl ond yn hyfryd. Mae o’n bendant wedi newid y stori. Mae wedi ychwanegu haen ar ben haen ar ben haen. Be sy’n gret am hynny ydy, pan ti’n dod i flocio’r perfformiad, mae gen ti’r sylfaen gre’ yna yno’n barod. Mae wedi newid y ddeinameg yn bendant a’r llinell stori wedi newid mymryn ond yn ei hanfod yr un un peth ydy hi, jest bod gynon ni fwy o bosibiliadau chwarae efo’r trydydd cymeriad.
Pwy yw dy hoff actor a pam?
Mae’n newid drwy’r amser rili. Ond, dw i newydd fod yn gwylio Dancer in the Dark efo Björk yn canu ac yn actio’r prif gymeriad ynddi. Mae hi jest yn anfarwol, ma’ hi mor gynnil, mae’n ffilm fendigedig ac yn ofnadwy run pryd. Ond, i mi, mae hi yn y rhan yna yn un o’r pethe gore dw i wedi’i weld ar lwyfan a sgrin, ma’ hi’n wych!
Petaet yn cael un dymuniad yn y byd – beth fyddai’r dymuniad hwnnw?
Cael gwared o dlodi drwy’r byd i gyd. Mae’n rhywbeth sa ni wedi gallu gwneud sawl gwaith drosodd ‘sa gynon ni fyd cyflawn. Dyna fasa fy nymuniad i.
Mewn cyfres o gyfweliadau, mae’r Frân Wen yn mynd tu ôl i lenni’r ymarferion i ddarganfod mwy am dîm creadigol Shabŵm.
Fedri di ddweud rhywbeth wrthym ni am dy gymeriad di yn Shabwm?
‘Dw i’n chwarae cymeriad o’r enw Twrw. Mae Twrw yn dueddol o fyw yn ei fyd bach ei hun yn gwneud petha ei hun. Fel mae’r enw’n awgrymu, mae swn a synau a cymysgedd o wahanol synau yn bwysig ym mywyd Twrw.
Sut fyddet ti’n disgrifio’r sioe mewn ychydig eiriau?
Mewn ychydig eiriau, yn sioe Shabwm bydd rhywun yn mynd ar daith lle mae synau a cherddoriaeth ac effaith y pethau hynny yn bwysig iawn. Mi fydd hi’n daith gyffrous iawn. Mi fyddwn ni’n defnyddio llawer o synhwyrau – ddim dim ond sain ac ati. Cyffrous, mewn un gair.
Sut aethoch chi ati i greu y sioe?
O’r cychwyn cyntaf, rydan ni wedi archwilio pob mathau o bethau – mae wedi bod yn gyfnod rhydd iawn o archwilio sawl trywydd, sawl stori a sawl agwedd ar bethau’n ymwneud â sain, distawrwydd ac emosiwn. Rydan ni wedi archwilio a chwarae a gobeithio bydd y cyfanwaith ar y diwedd yn dangos bod ni wedi mynd ati i chwarae lot.
Beth wyt ti’n ei fwynhau fwyaf am y broses ddyfeisio?
Mae’n braf cael cyfle – cyfle prin iawn i chwarae ac archwilio. ‘Dw i hefyd wrth fy modd yn cydweithio efo pobol wahanol. Rydan ni’n griw da yn fan hyn – mae gynon ni Lois yn gwneud y gwisgoedd a Gruff yn gwneud y sain. ‘Da ni’n gyd yn dod a rhywbeth gwahanol i’r broses greu. Leis, finna a Gwennan yn actorion. Hefo’n gilydd, mae na lot o syniadau gwahanol – falle petha faswn i ddim yn meddwl amdanynt fy hun. Felly, ‘dw i’n mwynhau’r agwedd o gydweithio â phobl greadigol.
Sut brofiad ydy cydweithio gydag ysgolion lleol ar ddatblygu’r cynhyrchiad?
Mae cydweithio gyda’r ysgolion wedi bod yn wefr. Mae gen i bedwar o blant adref fy hun felly ‘dw i wrth fy modd yn gweld effaith pethau creadigol ar blant. Mae hynny wedi bod yn fodd i fyw i mi. Cael cyfle i fynd i mewn i ysgolion a chlywed eu safbwynt a’u syniadau nhw. Yn aml iawn, mae gan blant syniadau llawer gwell na ni oedolion felly ‘da ni’n cael bwydo oddi ar eu syniadau nhw. Gobeithio bydden nhw’n gweld ôl hynny yn y perfformiad a bydd o’n eu cyffroi nhw.
Sut brofiad ydy rhannu llwyfan gyda Leisa a Gwennan?
Mae’n brofiad arbennig. Mae o fel taswn i’n nabod y ddwy ohonyn nhw ers blynyddoedd lawer. Mae’n gret! Mae o fel cydweithio efo teulu. ‘Da ni hefo’r un dyheadau ‘dw i’n meddwl. ‘Da ni yn canolbwyntio ar greu’r sioe orau bosibl ar gyfer y bobl ifanc sy’n mynd i ddod i’w gweld hi. Pan ma’ pawb ar yr un trywydd, ar yr un llwybr yn trio dweud un stori, mae’n gret.
Faint mae dychymyg plant wedi ychwanegu at y sgript?
Does dim llawer o ran sgript ar hyn o bryd . Ond ydy, mae’r plant wedi cael dylanwad mawr iawn. Rydan ni wedi cael cyfle i chwarae efo syniadau’n hunain, cyflwyno’r syniadau i’r plant – gweithio ar y syniadau hynny ein hunain a wedyn mynd nol atyn nhw i ddangos y datblygiad. Mae hynny wedi bod yn gyffrous – gweld sut mae’n nhw’n ymateb i’w syniadau nhw wedi datblygu.
Pwy yw dy hoff actor a pam?
‘Dw i’n mwynhau gweld pob math o actorion.
Tasa ti’n cael un dymuniad yn y byd – beth fyddai’r dymuniad hwnnw?
Bod pawb yn parchu ei gilydd.
Ydy’r llinyn storiol wedi newid lot yn ystod y broses ddyfeisio?
Ydi, mae o. Mae o wedi newid sawl gwaith. Rydan ni wedi mynd ar ôl lot o wahanol lwybrau a wedyn mae hynny wedi sbarduno rhywbeth newydd. Mae ‘chydig fel arbrofi mewn labordy lle mae mynd ar ôl un canlyniad ti’n meddwl yn esgor ar betha’ cwbwl newydd a gwell. Mae wedi newid yn gyson a ‘da ni’n dal i chwarae efo syniadau. Mae eistedd o amgylch bwrdd a’i drafod o yn un peth – ond mae’n beth gwahanol wedyn rhoi’r sioe ar ei thraed a gweithio arni yn gorfforol hefo lleisiau a sain. Mae’r sioe yn newid yn gyson, felly ffendio’r resipi perffaith erbyn y diwedd ydi’r gamp rwan. Allai’m aros i berfformio’r cynhyrchiad fis Ionawr.
Mewn cyfres o gyfweliadau, mae’r Frân Wen yn mynd tu ôl i lenni’r ymarferion i ddarganfod mwy am dîm creadigol Shabŵm.
Sut fyddet ti’n disgrifio sioe Shabwm mewn ychydig eiriau?
Sioe am y cysylltiad rhwng distawrwydd, cerddoriaeth a twrw.
Sut wyt ti wedi mynd i’r afael â chreu’r set a’r props? Beth oedd yn bwysig i ti ystried wrth wneud hyn?
Nifer o elfennau! ‘Dw i’n gorfod meddwl am sut mae’r plant am ymateb i be dw i’n mynd i roi o’u blaenau, hefyd pa mor hawdd ydy mynd i mewn ac allan o ysgolion ac wedyn sut mae’n ychwanegu at y stori ‘da ni’n trio’i dweud.
Beth sy’n dy ysbrydoli wrth i ti fynd ati i greu?
Mae’n gallu bod yn rhywbeth ‘dw i ‘di weld, teimlad, be ‘da ni’n siarad amdano neu weithiau mae lliwiau yn fy ysbrydoli. Yn yr achos yma mae plant o’r ysgolion wedi f’ysbrydoli hefyd.
Sut brofiad ydy cyd-weithio gydag ysgolion lleol ar ddatblygu’r cynhyrchiad?
Mae wedi bod yn brofiad gwych. Mae gan blant gymaint o syniadau gwahanol i ni fel oedolion. Maen nhw’n meddwl am bethau mewn ffyrdd gwahanol i ni. Mae wedi bod yn gret gweithio hefo nhw ar wahanol lefelau o ran be maen nhw wedi ddweud, o ran be maen nhw wedi tynnu llun ar bapur ac o ran eu hwyliau cyffredinol a’u syniadau.
Dy hoff ran o’r broses greu a pam?
‘Dw i’n licio cael fy nwylo yn fudur felly i mi, y rhan fwyaf difyr ydy’r rhan lle dw i’n dechrau gwneud pethau. Mae dyluniad yn amlwg yn rhan fawr o’r broses. Ond, pan dw i’n cael dechrau creu petha’n 3D, dyna’r rhan ‘dw i’n ei fwynhau fwyaf.
Petaet yn cael un dymuniad yn y byd – beth fyddai’r dymuniad hwnnw?
‘Swn i wrth fy modd yn gallu siarad bob iaith yn y byd!
Faint mae dychymyg plant wedi ychwanegu at ddyluniad y gofod a’r hyn ti’n greu?
‘Da ni’n gobeithio bod ‘na un peth eitha’ hudol yn mynd i ddod ar ddiwedd y sioe sy’n syth o ddychymyg y plant. Wnai ddim dweud gormod, i chi gael syrpreis bach! Ond, mae ‘na un elfen ar ddiwedd y sioe sy’n llawn o ddychymyg y plant. Felly, gewch chi weld!
Cliciwch ar deitl y blogiad a sgrolio i lawr y dudalen i ymateb i’r blog hwn
Mae ‘na ddatblygiadau di-ri yn ystafell ymarfer Shabŵm! Mae’r criw wedi bod yn gweithio ar gyfarfyddiad cyntaf Twrw a Smic, prif gymeriadau’r sioe. Mae’r cyfarfyddiad yn ddipyn o syrpreis i’r ddau gan nad ydyn nhw’n nabod eu gilydd!
Y newyddion mawr arall yw si bod na gymeriad newydd yn rhan o’r sioe. Mi gawn ni wybod mwy am hyn wrth i’r ymarferion ddatblygu!
Mae Lois, y cynllunydd yn parhau i weithio ar y set ac i feddwl am fanylion y sioe, y props ayyb.
Hoffai Cwmni’r Frân Wen gydnabod cefnogaeth ariannol gan Gyngor Celfyddydau Cymru, Cyngor Gwynedd, Cyngor Sir Ynys Môn a Chyngor Bwrdeistref Sirol Conwy.
Cliciwch ar deitl y blogiad a sgrolio i lawr y dudalen i ymateb i’r blog hwn
Beth yw’r diweddaraf yn ystafell ymarfer Shabŵm? Mae’r criw wedi bod yn brysur yn datblygu syniadau ac yn dechrau creu modelau o’r set.
Mae Lois y cynllunydd wedi bod yn creu modelau bychan o gartrefi prif gymeriadau Shabŵm, Twrw a Smic. Sut fyddech chi’n mynd ati i greu cartrefi i’r cymeriadau hyn? Tybed pa mor wahanol fyddai bydoedd Twrw a Smic? Wrth i’r gwaith cynllunio barhau, mae’r actorion wedi bod yn brysur hefyd.
Mae Llyr sy’n actio cymeriad Twrw wedi bod yn datblygu arferion ei gymeriad o ddydd i ddydd ac wedi bod yn arbrofi gyda synau gwahanol i gyd-fynd â’r arferion hynny. Sialens Leisa sy’n actio Smic oedd darganfod atgofion.
Yn gyfeiliant i’r cyfan, mae Gruff sy’n gyfrifol am y gerddoriaeth wedi bod yn arbrofi gyda synau abstract ac offerynnau taro.
Sut fath o gerddoriaeth fyddech chi’n ddychmygu sy’n berthnasol i fywydau Twrw a Smic?
Dyma gipolwg o’r broses greu mewn lluniau …
Llyr – Twrw
Llyr – Twrw
Leisa – Smic
Leisa – Smic
Gruff
Lois
Hoffai Cwmni’r Frân Wen gydnabod cefnogaeth ariannol gan Gyngor Celfyddydau Cymru, Cyngor Gwynedd, Cyngor Sir Ynys Môn a Chyngor Bwrdeistref Sirol Conwy.
shabwm.wordpress.com 